Panorámica do Galiñeiro

O Miradoiro do Galiñeiro, a 143 metros de altura sobre o nivel do mar, ofrece unha moi boa vista da confluencia dos ríos Sar e Ulla, así como de todo o val deste último, que acabará formando a ría de Arousa. Este miradoiro está incluído no Catálogo das Paisaxes de Galicia.

O texto que segue a continuación foi publicado por Fernando Cabeza Quiles no grupo de Facebook de obaixoulla.gal.

Pensamos que o topónimo O Galiñeiro, derivado da palabra "galiña", en latín gallina, pode ter dous significados, un real, cando o topónimo nomea aldeas situadas en lugares chans, referido á presencia de galiñeiros de galiñas e outro, cando nomea cumes de montes, metafórico. Este segundo suposto debe corresponder ao nome do monte do concello pontevedrés de Pontecesures chamado O Galiñeiro, que puido ter sido comparado, ao ser un lugar visiblemente alto, cun galiñeiro ou poleiro onde se recollen a durmir as galiñas, escollendo lugares elevados. A unha relación de significados similar á que deu o topónimo debe corresponder a creación do substantivo común "galiñeiro" coa equivalencia de 'parte máis alta e arredada do escenario dun teatro ou cine'. A situación elevada do monte chamado O Galiñeiro foi aproveitada para construír alí un miradoiro, dende o que se ve (vía) unha ampla panorámica do tramo final do Ulla. Entre os equipamentos do lugar destaca, con relación ao tema que nos ocupa, a figura ornamental dunha galiña de pedra colocada sobre unha columna do mesmo material. Como se pode apreciar na foto, a ave está desprovista da súa cabeza, debido á chuvia e ao vento que alí baten con forza polo inverno. Non sabemos se sobe moita xente ao miradoiro. Se o facer, non verán nada, porque as árbores do bosque de piñeiros que creceron ao seu pé impide calquera contemplación paisaxista.