Porto de Padrón

Situado á beira do río Ulla, no lugar do Muelle, a súa estrutura principal está composta por un muro de contención, que delimita a ribeira e protexe a zona de tránsito e carga, ademais de dúas ramplas dobres empregadas para a carga e descarga de mercadorías. Está construído con grandes bloques de pedra.

Ten unha orixe vinculada á tradición xacobea, xa que, segundo a lenda, neste lugar arribaron os restos do Apóstolo Santiago. Durante a Idade Media, Padrón consolidouse como un importante porto fluvial, con dous embarcadoiros: un no río Ulla e outro no Sar. A súa ubicación estratéxica facilitou o comercio e a chegada de peregrinos por mar, beneficiándose da protección das Torres de Oeste en Catoira. Actualmente, Padrón conserva vestixios do seu pasado portuario e mantén a súa importancia dentro das rutas xacobeas.