Porta do Reloxo

A Porta do Reloxo ou Porta do Sol era unha antiga porta de entrada á vila de Padrón que perdurou até o século XVIII. No debuxo realizado por Pier Maria Baldi, que pasou por Padrón acompañando a Cosme de Médici en 1669, pódese entrever as feituras da antiga muralla da vila, a Escola de Cristos (á esquerda da anterior igrexa parroquial), xunto coa desaparecida Torre Moucha, e a anterior ponte sobre o Sar, coa caseta para cobrar impostos que tiña no medio.

A súa denominación ven do 1575, cando neste espazo foi colocado un reloxo. Aquí pasou a celebrarse o mercado de porcos, ao trasladarse desde o Campo do Souto, por cuestións de salubridade e polas queixas veciñais.