Igrexa de Santo Antonio de Herbón

Igrexa de estilo barroco que forma parte do conxunto de edificacións que conforman o Convento de Santo Antonio de Herbón. Planta en cruz latina, con cruceiro e presbiterio con bóveda de arestas que se destaca na planta e no alzado. Perpiaños e cantaría de granito, concertada e rexuntada. Sinxela fachada, cunha grande fiestra, de arco de medio punto e torre de campás dun só corpo, con pilastras e remate cilíndrico cego, con cupuliña e volutas. No interior, entaboamento seguido sobre pilastras, bóveda de canón, na nave e brazos do cruceiro, cúpula cega no cruceiro. No interior destaca un fermoso retablo no que traballaron os principais escultores galegos dos séculos XVIII e XIX.