Igrexa da Nosa Señora da Mercé

Igrexa de estilo barroco, planta de nave con presbiterio destacado e cantaría de granito e cachotaría. Fronte con porta de orellas molduradas e pinche con beiril que, revirándose horizontal, serve de pé á espadana dun só corpo, con pilastras afundidas e grande beiril moi moldurado; remate en triángulo curvo, ao que lle falta beiril e cruz. Presbiterio con arco triunfal de medio punto, sobre pilastras, con fermosa cancela, feita en madeira policromada.

Os veciños de Bandín dependen administrativamente de Padrón, mais eclesialmente pertencen a Barcala (A Estrada). A Romaría da Nosa Señora da Mercé celébrase sempre o 24 de setembro.