Fraiz S.A.

Coñecida popularmente como A Fraisa, foi constituída no 1974, chegando a ser nos anos 80 o serradoiro de madeira coa maior cota de mercado de Galicia. Manuel Jesús e José Fraiz Saa, dous irmáns naturais de Silleda pero que de moi pequenos se trasladaron cos seus pais a Padrón, fundaron esta empresa.

A familia sempre se dedicara ao sector da madeira, o seu pai fabricaba a parte inferior dos zocos e, coa chegada dos dous irmáns, diversificaron a produción a áreas como travesas de ferrocarril e doias de barrís para exportar o máis delicado viño. Pero o gran despegue da Fraisa chegou coa fabricación de parqué, sendo o de carballo o máis popular, moi demandado nos mercados europeos. No 2014 declarouse en concurso de acredores e actualmente a sociedade está extinta.