Pedra Ventureira

A Pedra Ventureira (do latín vultur, voitre), como di Manuel Lorenzo Baleirón en “Toponimia de Dodro e Laíño. Os nomes na auga”: "é unha enorme mole de granito con forma máis ou menos piramidal duns 4 metros de alto e uns 3 metros na base, situada na contorna do Miradoiro de Lestrobe. Está situada na parte de arriba do Castelo de Monte Vilar e ten unhas magníficas vistas da desembocadura do río Ulla".

Segundo as lendas, recibiu esta denominación pola dificultade que supoñía alcanzar o seu cumio sen ningún tipo de axuda. Desta forma converteuse nun reto para a mocidade dos arredores que intentaba coroala. Existe constancia que na antigüidade, a Pedra Ventureira estaba rodeada de flora, destacando as acacias; e de fauna, esquíos, xílgaros...