Productos Ulla

Anteriormente neste lugar emprazábase a Telleira de María Antonia e a Telleira de Rodríguez. Productos Ulla foi unha empresa de orixe familiar que comezou nos anos sesenta do século XX como unha empresa de produtos de limpeza, e no ano 1965 deu o salto á fabricación de ladrillos.

O texto que segue a continuación foi extraído de Memoria Industrial en Galicia, un proxecto fotográfico de Jose Chas sobre a ruína industrial galega.

Productos Ulla, S.L. foi fundada oficialmente o 7 de febreiro de 1969, esta empresa de orixe familiar iniciou a súa actividade na fabricación de produtos de limpeza antes de expandirse á produción de ladrillos.

Como moitas empresas do sector da construción, Productos Ulla viuse gravemente afectada pola crise de 2008. De rexistrar beneficios de 51.000 €, pasou a acumular débedas de 297.000 €. En 2010, segundo os sindicatos, a produción chegou a situarse por debaixo dos costes operativos.

A finais dese mesmo ano, a empresa detivo a súa actividade debido a unha débeda acumulada de 1,8 millóns de euros, na súa maioría con provedores de electricidade e gas, esenciais para o funcionamento dos fornos. Tamén debíanse varias nóminas aos traballadores: os salarios de novembro, decembro e xaneiro, ademais da paga extra. Desde entón, a actividade reduciuse á venda de material almacenado na planta.

O 13 de xaneiro de 2011, ante a inviabilidade de reflotar a empresa, declarouse en concurso de acredores. Como consecuencia, os 24 traballadores afrontaron un expediente de regulación de emprego, afectando especialmente a aqueles con entre 20 e 35 anos de antigüidade. Finalmente, lograron unha mellora nas súas indemnizacións por despido, que pasaron de 20 a 22 días por ano traballado, poñendo fin a máis de 40 anos de historia da empresa.